असार ९, काठमाडौं । गत २०७१ साल चैत्र महिनामा लिइएको एसएलसी परीक्षामा देशभरका दुई सय २१ विद्यालयको नतिजा शून्य भएको छ  । निजी २६ र एक सय ९५ सामुदायिक विद्यालयको नतिजा शून्यमा छ । परीक्षा नियन्त्रण कार्यालयका अनुसार एउटै जिल्लामा १४ वटा विद्यालयसम्म शून्य नतिजामा छन् । 

सबैभन्दा बढी खोटाङमा १४ वटा विद्यालयको नतिजा शून्य रहेको छ  । भोजपुरमा १२ वटा विद्यालयको नतिजा शून्य छ  । ताप्लेजुङ र बाँकेमा नौ–नौ, आठ विद्यालयको नतिजा शून्य हुनेमा डोटी, पाँचथर, इलाम, मुस्ताङ, उदयपुर छन्  । 

सुनसरी र कैलालीमा ६–६, सप्तरी र तनहुँका पाँच–पाँच विद्यालयको नतिजा शून्य छ  । सयभन्दा बढी विद्यार्थी भएका विद्यालयमा समेत शून्य नतिजा छ  ।परीक्षा नियन्त्रक विष्णुबहादुर द्वारेले विद्यालयको नतिजा शून्य हुनु दुःखको कुरा भएको बताए  । लगानी भएर पनि नतिजा शून्य हुनुको कारण खोजी गर्नु पर्ने उनले बताए । नयाँपत्रिका